Pandemieblues #3

Es isch emal en Bäizer gsi
Willi Meier hät er ghäisse
Wo inre chline Stadt am Rhy
Sini Bäiz jetzt nümm cha schmäisse
Sis Läbe, das sind sini Gescht
Die chömed nümm, die händs em gnaa
S hilft alles nüüt, au kän Protescht
Mr dörfed nümm zum Willi gaa

Bim Willi simmer us und ii
Läck, was hämir döte gfiired
S’isch öisi zwäiti Stube gsii
Händ glachet und händ gliiret
Emal hät öise Fründ, de Joe
Ja, das wäiss i no ganz genau
Es Mäitli grüeft, söll übere cho
Das Mäitli isch hüt sini Frau

Wänn wieder dörf de Willi ächt
Öisi schön Bäiz uuftue deet am Rhy
Rasch wär öis rächt, spat wär ganz schlächt
Oder ischs ‘mänd jetzt ganz verbi?

Ich ha de Willi geschter troffe
Ufs Arbetsamt händs en bschtellt
Hanen gfrögt, wie isch es gloffe
De Willi hät mers dänn verzellt:

Sie hetted gern en neue Job?
Dänn nähmed Sie doch bitte Platz
Was chönd Sie dänn, wo sind Sie top?
Verzelled Sie s öis, i’n äim Satz
Mir findet öppis, s wär ja glacht
Im Büro? Oder im Verchauf?
Händ Sie schomal so öppis gmacht?
Zäiged Sie mal de Läbenslauf!

Aber Sie, Sie sind ja Gastronom!
Und Konkurs gmacht? Das isch jetzt schlächt
Was händ Sie suscht no für Diplom?
Kän Schuelabschluss, ich wäiss nöd rächt
Wüssed Sie, mir wänd die Beschte
Sie chönd drum sicher guet verstah
Dass mr müend d Bewerber teschte
Aber viele Dank, Sie chönd jetzt gah

Es isch emal en Bäizer gsi
Willi Meier hät er ghäisse
Wo inre chline Stadt am Rhy
Sini Bäiz jetzt nümm cha schmäisse
Und wänn sie dänn wieder uuf cha tue
Niemer meh klatscht und gumpet
Bim Willi isch für immer zue
De Willi isch verlumpet