Hüt z’Nacht isch d’Liebi cho zu dir
Wie’s sälte häsch erläbt
So glücklich bisch scho lang nüm gsi
Bisch i de Wulche gschwäbt

So schön, so warm, so fäderliecht
Und won ihr eu dänn so
Ganz zart händ gno, fascht gha händ scho
Grad dänn sind d’Jeger cho

Sie händ di us dim Traum verschücht
Händ ihri Mässer gwetzt                            
In Näbel use händs di gjagt
Und d’Hünd händs uf di ghetzt

Du kämpfsch, du rännsch, es nützt dr nüt
Chunnsch eifach nöd vora
Und dänn sinds da, fascht händs die gha
Dänn häsch de Schlitte gnah

Usm Nüt cho, isch dä plötzlich da
Usm Näbel füehrt e Strass
Es schneit, s’hät Iis, s’isch alles still
Au d’Hünd ghörsch nümm, gisch Gas

S’gaht stäil bergab und dänn en Rank
Wänn brämse chöntisch, würsch
Wo d ane stürsch, de Abgrund gschpürsch
Schreisch – nass im Bett, und frürsch

Und s’Herz, das schlaat dr bis zum Hals
D’Nacht isch lang scho nüm din Fründ
Und s’Herz, das schlaat dr bis zum Hals
Wit wäg bälled es paar Hünd

Am Morge schälled’s Telefon         
Häsch gseeh, hüt Nacht häts gschneit
Äin hät drum scho de Tüüfel gholt
Isch us de Kurve gheit

Woher chunt nur das viele Bluet
Cha nöd vom Unfall si
S’chunt nöd hi, das passt nöd dri
Wer aber isch das gsi

Und s’Herz, das schlaat dr bis zum Hals
D’Nacht isch lang scho nüm din Fründ
Und s’Herz, das schlaat dr bis zum Hals
Wit wäg bälled es paar Hünd

Sie händ di us dim Traum verschücht
Du häsch dis Mässer gwetzt 
Dänn häsch sie dur de Näbel gjagt
Din Hund häsch uf sie ghetzt

Tuusigmal häsch sie zahle la
Dich gräächt i dere Nacht
Sie händ glacht und wiiter gmacht
Ums Schlafe händs di bracht

Und s’Herz, das schlaat dr bis zum Hals
D’Nacht isch lang scho nüm din Fründ
Und s’Herz, das schlaat dr bis zum Hals
Wit wäg bälled es paar Hünd

Hüt z’Nacht isch d’Liebi cho zu dir
Sie hät dich überläbt
So glücklich bisch scho lang nüm gsi
Bisch i de Wulche gschwäbt

So schön, so warm, so fäderliecht
Und won ihr eu dänn so
Ganz zart händ gno, fascht gha händ scho
Isch’n neue Morge cho