Tanzlied

Hinter Dir spielt d’Musig 
Und hinter Dir wird tanzt
Aber du, du häsch di
Tüüf i dim Loch verschanzt

Deet hinter dir wird gschwätzt
Deet hinter dir wird glacht
Hinter dir gseht niemerd
Wie dich das fertig macht

Dass‘ di nüm händ welle
Dass sie di nüm wänd gseh
Nüm wänd uf die zelle
Das tuet scho huere weh

Hinter dir dis Läbe
Hinter dir dini Wält
D’Arbet und d’Kollege
Und Ändi Monet Gäld

Hinter dir spielt d Musig
Deet hinter dir wird glacht
Hinter dir gseht niemerd
Wie dich das fertig macht

S’Läbe lang dich iigsetzt
Es Läbe lang häsch gmacht
All’s was sie verlangt händ
Und mängisch au no z’Nacht

Ja, das isch ja scho rächt
Doch alles gaht mal z’Änd
Zit, dass mir de Junge     
Jetzt au e Chance gänd

Hinter dir spielt d Musig
Deet hinter dir wird glacht
Hinter dir gseht niemerd
Wie dich das fertig machtt

Äi Tür händs dr zueknallt
En anderi gaaht uuf
Dörfsch di nur nöd ufgäh
Du bruuchsch nur ä bitz Schnuuf

Äi Tür die isch zueknallt
Ab’r Türe gits no vill
Dörfsch di nur nie ufgäh
S’gaht vieles wäme will

Vor dir spielt jetzt d’Musig
De ganz Tag bis id Nacht
Hinter dir isch uufgrumt
Nüt, wo di fertig macht

Vor dir spielt jetzt d’Musig
Und vor dir ligt jetzt d’Wält
Hinter dir isch nüt meh
Und wänn de Wecker schällt

Spillt vor dir jetzt d’Musig
Und s’chunt au wieder Gäld
Spillt vor dir  jetzt d’Musig
Und ligt vor dir jetzt d’Wält