Talking Blues

Hüt morge i de Isebahn han ich ihn wieder gseh
S isch alles wieder ufecho, und jetzt tuets wieder weh
Ha nöd gwüsst, dass er dusse isch, es hät mr’s niemerd gsäit
Ich wäiss nöd, was i säge söll, hey Rolf, es tuet mr Läid

Sit dänn, wo’s ihn händ ine gno und mich händ laufe laa
Will er meh Muet hät gha als ich, han au ich käi Rueh me gha
Ich hamer tuusig Vorwürf gmacht und ghofft, es göng verbii
Wänn statt em Max ich gschosse hett – Zum Glück ischs nöd so gsii

Mr fahred i de Isebahn
Es isch egal wohii
Mr wüssed womer her sind cho
Deet wämer nüme hii
Mr fahred i de Isebahn
Dur d Zit und dra verbii
Mr wüssed womer her sind cho
Nur nöd, was morn wird sii

Mr händ is gäge alles gwehrt und öis fascht alls erlaubt
Bald chäm, händs gsäit, d’Revolution, mir händ das alli glaubt
Deet obe, deet händs nume gschnorrt und suscht isch nüt passiert
De Rolf hät sich e Browning bsorgt, Zwänzg Jahr hät er kassiert

Mr fahred i de Isebahn
Und wüssed nöd wohii
Mr wüssed womer her sind cho
Und wer mir mal sind gsii
Mr fahred i de Isebahn
Dur d Zit und dra verbii
Mr wüssed womer her sind cho
Nur nöd, was morn wird sii

De Rolf isch hüt en alte Maa, hetti vill z’verzelle
Sie händ em aber d’ Stimm wäg gnoo, nüt meh ghöre welle
Siebehunderttuusig Stunde sind uf sim Tacho scho
Aber nur die paar Sekunde, wo’s gchlöpft hät, wäiss me no

Mr fahred i de Isebahn
Und wüssed nöd wohii
Mr wüssed womer her sind cho
Und wer mir mal sind gsii
Mr fahred i de Isebahn
Dur d Zit und dra verbii
Mr wüssed womer her sind cho
Nur nöd, was morn wird sii

Mir sind hüt mit de Isebahn zrugg womr mal sind gsi
Und wo mir nüme anewänd, s’isch trotzdem nöd verbi
Mr sind hüt mit de Isebahn ganz tüüf is Land vom Schmerz
Und mit de Hand, wo gschosse hät, berüehrt de Rolf mis Herz.