Wänns di bald butzt
Tuesch ufruume
Tuesch s’Züüg in Ornig bringe
Alles aaluege
S Foti vom Lotti nomal aaluege
Nomal Ziit näh fürs Lotti
Und dänn furt mit em Foti

Wänns di bald butzt
Tuesch nur bhalte
Was di froh und glücklich macht
Was weh tuet chunt furt
Furt mit em Grümpel und wäg mit em Züüg
Bliib a dim Züüg nöd chläbe
Dänn häsch meh Ziit fürs Läbe

Tue alles nomal aaluege
S Foti vom Lotti nomal aaluege
Nomal Ziit näh fürs Lotti
Und dänn furt mit em Foti

Wänns di bald butzt
Häsch nomal Luscht
Uf dini guete Fründe
Lad i zume Fäscht
Und dini Liiche dune im Chäller
Die mues niemerd me finde
La die schnäll no verschwinde

Wänns di bald butzt
Händ di alli gärn
Und plötzli vill Zit für dich
Und dis Teschtamänt
Du häsch kä Luscht und ä kä Ziit für Striit
Lüt lieber em Nachber a
Büüt em Schnaps und Friede a

Tue alles nomal aaluege
S Foti vom Lotti nomal aaluege
Nomal Ziit näh fürs Lotti
Und dänn furt mit em Foti

Wänns di bald butzt
Sind all truurig
Sie brüeled und sind truurig
Haltsches fascht nöd uus
Jetzt söttsch au no die Verwandte tröschte
Sölled doch chli fröhlich sii
Vilicht butzts au sie scho gli

Wänns di bald butzt
Häsch ändlich Zit
Muesch ändlich nümm pressiere
S’wird niemer verruckt
Wänd z’spaat bisch oder vilicht gar nüm chunsch
Es isch glich, wänn gar nüm chunsch
Es isch okay, wänn gar nüm chunsch

Tue alles nomal aaluege
S Foti vom Lotti nomal aaluege
Nomal Ziit näh fürs Lotti
Und dänn furt mit em Foti