Talking Blues

Werum äis Land is ander iimarschiert, das hät mi scho als Bueb sehr intressiert
Has dänn nöd verstande und au nöd hüt, was me nöd verschtah chan, das isch für nüt
Ha spöter dänn, ich bi scho grösser gsi, de Pfarrer gfrögt: «Mues Chrieg dänn sii?
Wie cha öise lieb Gott das erlaube?» – «Nöd grüble, Bueb, muesch äfach anen glaube»

Wo de Herrgott spöter is Dorf isch cho und de Pfarrer zu sich zrugg häi hät gno
Mit Gloggeglüüt und schöne warme Wort, händs immer no gschosse a tuusig Ort
Ich ha mr, hey, dänn drum gli emal gsäit «Tschüss zäme, ich gang jetzt, ich bin beräit»
Ha lang überlegt und dänn entschiede, es isch mr au nüt anders übrig blibe

S’hät grägnet, woni de Zug ha gno
Und so vo mim Dorf id Stadt bin cho
Grägnet häts, woni de Zug ha gno
Und so vo mim Dorf id Stadt bin cho

Niemerd hät uf mi gwartet, ganz eläi, wär i fascht umkehrt und grad wieder häi
«Wär bisch dänn du», händs gfrögt «und säg, woher?» Ohni Stutz im Sack isch es huereschwer
Liebi z’finde und sich Ghör z’verschaffe; Gäld isch und bliibt e mächtigi Waffe
S’hät grägnet dänn, woni de Zug ha gno, und eso vo mim Dorf id Stadt bin cho

Es isch dänn doch no andersch usecho. Ha gmerkt, es gaht au andre Lüt eso
Me händ is zämetaa und sind marschiert, für e bessri Wält hämer demonschtriert
Nöd allne hät das ine passt in Grind: «Scho i de Tagesschau nur toti Chind!
Und jetz die Demos, was das wird choschte! Fahred öppe ab, mr wänd go poschte!»

S’hät grägnet, woni de Zug ha gno
Und so vo mim Dorf id Stadt bin cho

Bald isch d’Schmier da gsi mit Gummi und Gas, umzingled händs is, und wüsseder was
Dänn sind vo allne Site immer meh – Mänsche cho, Polizei hät me nüme gseh
Tusigi mit farbige Transparänt, vill händ au Musig gmacht mit Inschtrumänt
S’isch gsunge worde i de ganze Stadt, und i de Zitig uf em Titelblatt

Isch en dicke fette Titel gschtande: Die ganzi Wält sig jetzt iiverschtande
Ändlich seged jetzt alli Chrieg verbi. Vo jetzt a wird überall nur Friede si

S’hät grägnet, wo n i de Zug ha gno
Und so vo mim Dorf id Stadt bin cho

Woni dänn ufgwacht bi vom Chileglüüt, dihäi i mim Dorf wo sich alli Lüt
Für öise Herr Pfarrer schön agläit händ, wo mr hüt Namitag begrabe wänd
Hani «Himmel!» grüeft – hey liebe Gott, vom Friede nume tröime, isch nöd wasi wott
Vom Friede nume tröime, isch nöd was i wott

S’hät grägnet, wo n i dänn de Zug ha gno
Und doch no vo mim Dorf id Stadt bin cho
Grägnet hät’s, wo n i de Zug ha gno
Und doch no vo mim Dorf id Stadt bin cho